250 денари за вработени, по 100 за пензионери; се печатат електронските здравствени картички

Добивај вести на Viber

Изработката на електронските здравствени картички се одвива редовно и согласно планот, соопштија од Фондот за здравствено осигурување на Македонија (ФЗОМ).

До крајот на минатата година се подготвуваа податоците за издавање и изготвување електронски здравствени картички за неосигураните лица (невработените лица). Истите во најголем дел се изработени и дистрибуирани во нашите подрачни служби од каде осигурениците може да ги подигнат по доставен доказ за направена уплата за износот за ЕЗК согласно правилникот за цена на чинење на ЕЗК, посочуваат од Фондот. Здравствената електронска картичка чини 250 денари за вработените, 100 денари за невработените и оние со ниски примања и пензионерите, а социјалните случаи врз основа на потврда од Министерството за труд и социјална политика ја добиваат без надомест. Оние осигуреници на Фондот, од категоријата неосигурани лица кои немаа поднесено барање за издавање на ЕЗК или пак барањето не им било комплетно, наведуваат од Фондот, картичка треба да земат за време на пререгистрација на невработените која е во тек. Од Фондот информираат дека за нив се изготвени околу 100.000 картички и осигурениците може да ги подигнат во подрачните служби на Фондот, а се работи на печатење дополнителни 300 илјади парчиња за здравствени осигуреници и нивните членови од семејствата. За вработените во приватните фирми за своите вработени и членови на нивните семејства, веќе може да се поднесуваат барање за издавање на електронската легитимација, а штом бидат изработени се известуваат овластените лица да ги подигнат картичките за своите вработени по претходно докомплетирање на документите потребни за подигање на ЕЗК, се вели во соопштението.

Пензионерите пак треба да поднесат барање за издавање картичка кај матичните лекари, а  во моментов за нив има испечатено околу 50.000 картички, додека во фаза на изработка за нив се уште околу 150.000 легитимации.

Досега се изработени 500.000 електронски здравствени картички и тековната продукција се одвива непречено, велат од Фондот.