АЕК повтори: И при-пејд броевите мора да се регистрираат
Објавено во: Мои пари 10 Јануари, 2013
Сите корисници на при-пејд картички, кои досега не ги регистрирале своите броеви, се уште имаат можност тоа да го направат кај своите мобилни оператори, побараа денеска Агенцијата за електронски комуникации (АЕК).
Регистрацијата може да се изврши на повеќе начини. Наједноставно е претплатникот директно да се пријави на самото продажно место и да приложи документ за идентификација по што веднаш ќе се внесат личните податоци на неговиот при пејд број. Ова може да се направи и ако претплатникот се јави на телефон кај соодветнот оператор(Т-мобиле - 1233, Оне оператор - 14181, Вип оператор - 140150), односно ако ги испрати податоците по СМС порака или на веб страната на операторите.
Според АЕК, причина за реализирање на тој проект, поддржан од трите мобилни оператори во државата, се податоците и искуствата кои покажуваат дека користењето нерегистрирани при пејд картички предизвикувало несакани последици, неретко при-пејд картички се злоупотребуваат, се користат како анонимни броеви и ја нарушуваат безбедноста на голем број на граѓани.