Анѓушев на средбата со Жбогар откри дека се подготвува нов закон за енергетика
Објавено во: Македонија 07 Јули, 2017
Вицепремиерот за економски прашања Кочо Анѓушев на денешната средба со евроамбасадорот Самуел Жбогар откри дека до крајот на годинава ќе биде донесен нов закон за енергетика кој ќе посвети внимание и на обновливите извори на енергија.
Анѓушев дополни дека реформите во енергетскиот сектор ќе бидат во фокусот на Владата. Во согласност со договорот за Енергетска заедница и препораките на Европската комисија, до крајот на 2017 година ќе биде донесен новиот Закон за енергетика.
„Во новиот Закон за енергетика ќе ги имплементираме Третиот енергетски пакет на Европската унија и мерките препорачани од Енергетската заедница. Ќе работиме на искористување на сите постојни капацитети за производство на енергија во земјата, но ќе поддржуваме и изградба на нови капацитети, особено од обновливи извори на енергија“, дополни Вицепремиерот.
Да постетиме дека денеска токму Фактор изработи Анализа за најпотребните реформи кои треба да ги преземе новата Влада и кои се клучни аспекти на кои треба да им се посвети внимание како борба со енергетската сиромаштија, поголема енергетска ефикасност и користење на обновливите извори на енергија.
Анѓушев исто така вети и еднаков третман на домашните и странските компании како нов принцип за привлекување на инвестиции, а од евроамбасадорот Жбогар доби поддршка за најавените економски реформи.