Анѓушев се дообјасни за калориметрите
Објавено во: Економија 18 Декември, 2017
Вицепремиерот за економски прашања Кочо Анѓушев појасни пред медиумите дека со новиот закон за енергетика не е предвидено поставувањето на калориметри за топлинска енергија товарот за трошоците да падне на граѓаните, односнов врз корисниците и ќе се најде начин како таа постапка да се олесни.
Тој ги нарече дезинформација тврдењата на дел од експертската јавност дека секое домаќинство ќе треба да одвои по 50 евра од радијатор за да ја исполни законската обврска. Калориметрите ќе треба да покажуваат колку точно топлинска енергија се троши во секој стан.
„Тука може државата да помогне. Ќе направиме сè тоа да не биде на товар на граѓаните на Република Македонија. Во разговори сме со повеќе институции. Тука би ги споменал Хабитат, па еве и во рамките на овој Зелен климатски фонд да обезбедиме средства за тоа да биде направено од тие финансиски извори, а не на товар на граѓаните на Република Македонија.“ – изјави Кочо Анѓушев, вицепремиер за економски прашања
Законот за енергетика е се уште во владина процедура и откако ги помина фазите на јавна дебата ќе се врати на повторно разгледување пред конечниот предлог закон да биде испратен на носење во Собранието. Законските измени вклучувајќи ги реформите наметнати од Европската енергетска заедница, либерализацијата, како и снабдувањето со гас предвидено е да бидат изгласани до средина на следната година, а да се применуваат од 2019 година.