АНКЕТА: Еве што мислат Бугарите за случувањата во Македонија
Објавено во: Македонија, Балкан 11 Мај, 2017
Истражувањето на „Галуп интернешнл“ покажува дека граѓаните на Бугарија се загрижени за настаните во Македонија.
Случувањата во земјава се многу важни за Бугарија, одговориле 52% од бугарските граѓани на анкетата.
На прашањето тоа што во моментот се случува во Македонија е многу важно за Бугарија, 52% од испитаниците одговориле со „да“, 12 со „не“ и 32 со „не знам“.
Од анкетата се гледа дека Бугарите не се добро запознаени со темата, но веруваат дека е важна и предизвикува загриженост кај нив. Иако, преовладува мислењето дека кризата ќе се продлабочи, една десетина од испитаниците се со став дека тоа што се случува во Македонија не е важно за Бугарија.
Историската блискост меѓу двете земји влијае на одговорите, па така со цел да се измери чувствителноста и општиот однос кон случувањата во Македонија во прашањето намерно не е прецизирано за какви настани станува збор и е оставено само „тоа, што се случува во Македонија“, пишуваат бугарските медиуми.
Македонија е меѓу првите десет земји, кои Бугарите ги сметаат за блиски, покажува неодамна спроведеното истражување на „Галуп интернешнл“ за ставот на Бугарите кон 42 други држави.
Месечните истражувања на „Галуп интернешнл“ сепак покажуваат доза на недоверба на бугарските граѓани кон Македонија. Бугарите имаат недоверба во однос на македонските политичари, додека кон македонските граѓани и земјата во целина односите ги оценуваат како блиски. Доказ за тоа е истражувањето од 2015 година, за време на политичката криза во Македонија.
На прашањето дали сте согласни или не дека бегалците од Македонија се закана за националната безбедност на Бугарија, 67% од Бугарите одговориле „не“, наспроти 10 проценти со „да“ и 23% со „не знам“.