АНКЕТА: Речиси секој втор работник е пријавен на пониска сума од онаа што ја добива
Објавено во: Економија 26 Октомври, 2016
Скоро секој втор работник е пријавен на плата која е пониска од таа што реално ја добива.
Ова го покажала анкетата спроведена од Центарот за истражување и креирање на политики (ЦИКП), во текот на мај и на јуни годинава. Објаснуваат дека одговорноста за нецелосното исплаќање придонеси најмногу лежи кај работодавците, но виновни се и работниците кои ги прифаќаат овие услови.
„Еден од десет работници воопшто немаат потпишано договор за работа со својот работодавец, со што, покрај социјалните придонеси, се избегнува и плаќањето данок на приход. Последиците можат да бидат слаба или неквалитетна социјална и здравствена заштита, необјективна процена на големината на домашниот бруто-производ, нереален број на невработени, односно вработени и социјално загрозени лица, голема стапка на даночна евазија и помал буџет, што претставува предизвик и за фискалната политика на државата“ – стои во истражувањето на ЦИКП.
Резултатите покажуваат дека околу 22,1% од анкетираните би прифатиле да работат непријавени ако добиваат повисока плата. Од испитаниците 62,7% во споредба со 56,4% во 2014 година изјавуваат дека задолжителното здравствено и социјално осигурување не им обезбедуваат доволно чувство на сигурност, може да се смета за дополнителна причина за прифаќањето на непријавена работа.
Целта на оваа анкета е да се утврдат различните форми на скриени економски активности денес и да се споредат со резултатите од пред две години истиот период.
Во текот на месец мај/јуни 2016 година, Центарот за истражување и креирање на политики (ЦИКП), направи теренска анкета на репрезентативен примерок од 1.097 испитаници на територијата на Република Македонија.