АНКЕТА ВО ГРЦИЈА: Мнозинството не прифаќаат име со термин Македонија
Објавено во: Балкан 22 Октомври, 2016
Повеќе од половина Грци не прифаќаат терминот „Македонија“ да стои во конечното решение за името на нашата земја, а само тројца од 10 Грци прифаќаат сложено решение за името.
Од испитаниците, 77% сметаат дека е важно да се реши прашањето за името.
Ова го покажуваат резултатите од анкета на јавното мислење во Грција, направена од грчката фондација за надворешна политика „Елиамеп“ во соработка со Универзитетот „Македониа“, во рамки на програмата „Дијалог во Југоисточна Европа“ на Универзитетот „Колумбија“.
Анкетата која е спроведена на репрезентативен примерок од 1.000 лица, покажува дека со официјалната грчка позиција, односно сложено име со терминот „Македонија“, се согласуваат само 28% од испитаниците, додека дури 57% бараат конечното решение на името воопшто да не го содржи терминот „Македонија“. Само 10% поддржуваат Македонија да го задржи уставното име.
Одолжувањето на решавањето на спорот, според 71% од анкетираните, ѝ наштетува на Грција.
Мнозинството од испитаниците не се оптимисти дека односите меѓу двете страни ќе се подобрат во следните години и главно веруваат дека ќе останат како што се или, пак, ќе се влошат. Но, 51,5% сметаат дека решението за името би им било од корист и на двете страни.
Мнозинството Грци имаат негативно мислење за Македонија. Само 7,5% од испитаниците ја гледаат нашата земја позитивно, додека 61,5% имаат негативно мислење за Македонија.
Од македонска страна, според слично истражување кое беше спроведено во Македонија во рамки на истата програма на Универзитетот „Колумбија“, 69,7% изјавиле дека имаат негативно мислење за Грција. Сепак, грчкиот негативен став, скептицизмот и непријателскиот однос кон странските држави изгледа како тренд меѓу грчкиот народ. Резултатите покажуваат дека 69% од Грците имаат негативен став за Турција, 56% негативен став за Германија и 51,5% негативно мислење за Европската Унија.