АРАПСКИТЕ ЗЕМЈИ МУ ДАДОА РОК НА КАТАР: Од што земјата мора да се откаже?

Добивај вести на Viber

Aрапските земји испорачаа барања за Катар за надминување на кризата. 

Четири држави предводени од Саудиска Арабија издадоа список на барања за завршување на нивниот бојкот против Катар. Се бара Катар да ја затвори телевизиската мрежа Ал Џезира и да ги прекине односите со Иран. Листата содржи 13 точки  со кои се бара и Катар да ги прекине сите врски со движењето Муслиманско братство и со други групи како Хезболах, Ал Каеда и Исламска држава. Катар има рок од десет дена да ги исполни барањата. 

Катар треба да се откаже од натурализација на граѓани на четири земји и да ги протера тие кои се на негова територија. Предвидено е и Катар да ги предаде сите лица по кои е распишана потерница во Саудиска Арабија, Египет, Обединети Арапски Емирати и Бахреин под обвинение за тероризам; да го запре финансирањето на екстремистичките организации, прогласени за терористички од страна на САД, како и да достави информации за опозиционерите.

Што се однесува во делот за Иран, се наведува дека Катар треба да ги затвори дипломатските претставништва во Иран и да ги протера сите членови на елитниот ирански воен Корпус на гардата на Исламската револуција и да тргува со Техеран во согласност со американските санкции.

Саудиска Арабија, Египет, Обединетите Арапски Емирати и Бахреин ги прекинаа односите со Катар овој месец обвинувајќи го за поддржување на тероризам.