БАДНИКОВА ТРПЕЗА: Мрсни цени за посен Бадник!
Објавено во: Финансии 05 Јануари, 2017
Како пред Велигден така и пред Бадник.
Пазарџиите ги набилдаа цените па за да ја наполнат Бадниковата трпеза граѓаните ќе треба да потрошат околу 3000 денари.
Иако традицијата налага вечерата да биде посна, цените на производите кои вообичаено се наоѓаат на бадниковото мени, и не се така посни.
Лепче, грав, риба, тиква, туршија, сармички, посни пити и компири, се производите кои речиси секое семејство за Бадник ги поставува на трпезата. Бадниковата вечера, традиционално се збогатува и со портокали, мандарини, јаболка но и костени и ореви кои вообичаено, секоја година, ден пред Бадник, на пазарите се продаваат со драстично зголемени цени.
Така денеска поминавме на пазар и сами се уверивме. Костените се продаваат за 200 денари речиси на секоја тезга, а тука некаде се и оревите кои годинава чинат од 150 до 200 денари.
Осличот чини од 100 до 150 ден/кг.
Граѓаните реагираат и велат дека пазарџиите пред Бадник, освен костените, ги зголемиле цените и на зеленчукот и на рибата.
„Скапо особено ако чекаш и пазариш ден пред Бадник. За споредба, пред само една недела костените чинеа 150 денари, а сега се продаваат за 200 денари што е лудост. Дури и рибата ја поскапиле за 20 денари, како да само еднаш се пазари“, револтирано велат граѓаните.
Сепак, традицијата е таква. Граѓаните ќе стават од се по малку на маса без разлика што Бадниковата трпеза ќе биде скромна.