Банките со LinkedIn профил возвраќаат во јавната „битка“ за ФЕНИ

Добивај вести на Viber

Вербалната „војна“ меѓу трите банки доверители на ФЕНИ кои имаат побарувања од 40 милиони евра и неговите претходни или потенцијални сопственици Кунико и Енекод продолжува и денес. Банките излегоа со реакција на тврдењата на Кунико групацијата кои пак беа реакција на изјавите на Хари Костов околу изборот на новиот сопственик на ФЕНИ. Најинтересно е што банките меѓу главните аргументи го зедоа LinkedIn профилот на Дмитри Черкаски преку кој претходно беше испратена реакцијата на Кунико.

„Наводниот претставник на Кунико груп, банките доверители известуваат дека немаат намера преку средствата за информирање да полемизираат со некој Дмитри Черкаски, за сите негови невистини и небулози изнесени во соопштението. Инаку, банките не знаат во кое својство се појавува ова лице, ако се земе предвид дека на социјалната мрежа Линкедин се појавува како лице кое бара работа (во прилог е профилот на лицето Дмитри Черкаски, во кој се гледа дека е ЦФО на некоја интернационална група, а кој бара нови можности за вработување, но никаде не се споменува дека има некаква функција во „Кунико“). Од сето изнесено очигледно е дека ни тие самите не се сигурни кој е сопственик на „Фени Индустри“, затоа што зависно од расположението еднаш го претставуваат „Кунико“ како сопственик, а потоа со наводно склучен наводен договор како сопственикго претставуваат„Енекод“ се вели во реакцијата на банките доверители.

Претходно во текот на денот од Кунико посочија дека само тие може да одлучат кој ќе биде нов сопственик на ФЕНИ, а не банките. Токму тоа според банките е доволно за Кунико да не бара изговори и да ги исплати преостанатите плати на вработените, како и да ја продадат компанијата за 1 долар како што ветија.

Денеска банките заедно со потенцијалниот инвеститор швајцарскиот инвестициски фонд ФОС извршија увид во состојбата на фабриката ФЕНИ. Во игра за вложување покрај Енекод кој го спорат банките за досегашниот однос се компании со британски и француско-израелски капитал. На 29 ноември е закажано главното рочиште за водење на стечајната постапка на кое се можни нови обиди за одложување.