Бегалците Грујевски и Бошковски се во Солун: Толку блиску, а толку далеку

Добивај вести на Viber

Точно по три месеци откако им се изгуби трагата, грчката полиција ги уапси двајцата бегалци  Горан Грујевски и Никола Бошковски. Обвинетите, поранешни началници во Управата за безбедност и контраразузнавање, се криеле на само 80 километри од границата – во Солун. Тие од вчера се наоѓаат таму во притвор, но прашање е кога ќе бидат екстрадирани.

Грујевски и Бошковски се обвинети во случаите „Таргет“ и „Тврдина“ на Специјалното јавно обвинителство кои се однесуваат на злоупотребата на системите за прислушкување на УБК и на уништувањето на опремата.

Во текот на трите месеци потрага, двајцата беа барани на повеќе локации во земјава, но не беа најдени. Успеаја да избегаат во вакуум просторот, откако  Апелациониот суд во Скопје на 18 јули донесе одлука да им се одреди притвор, но тие останаа на слобода чекајќи го изјаснувањето на врховните судии. Врховниот суд, на чело со претседателот Јово Вангеловски, ја потврди одлуката за притвор дури на 26 јули, време кое им беше доволно за да избегаат. МВР објави потерници по нив и локални и меѓународни.

Министерот за внатрешни работи тврдеше дека нивното бегство е организирано и беше отворена истрага за да се открие кој им помогнал на двајцата бегалци да не отидат во притвор. Според Спасовски бегството е резултат на пропусти на судовите.

„Очигледно е дека овде станува збор за еден сплет на околности, на поврзаност меѓу јавното обвинителство, меѓу судството и меѓу структурите на поранешната власт кои што дозволија бегање односно напуштање на државата на овие две лица и за тоа верувајте дека се водат соодветни постапки и ќе дојдеме и до други лица кои сигурно го овозможиле тоа и за кои треба да се покрене сериозна одговорност’, смета министерот Оливер Спасовски.

Во меѓувреме, беше откриено дека Горан Грујевски имал двоен идентитет и друг пасош на име Владимир Варелов, кој е вистински идентитет на негов  сограѓанин од Велесвработен во Единица за брзо распоредување во МВР (ЕБР). Вториот идентитет на Грујевски му е даден незаконски, обелодени актуелниот директор на УБК, Горан Николовски.

Грујевски во притвор, Мијалков на слобода

Горан Грујевски важеше за човек од доверба на поранешниот директор на тајната полиција, Сашо Мијалков, но беше „зад сцената“ се до објавување на „бомбите“ од опозицијата. Тогаш неговиот лик излезе од анонимност и денес стана еден од најпознатите бегалци од Македонија.

Грујевски е доктор на науки, а докторирал на тема: „(Зло) употреба на посебните истражни мерки“, а ја одбранил во 2014 година на Правниот факултет „Јустинијан Први“.

Тој во „Таргет“ се товари дека уништувал документација поврзана со прислушувањето, а во случајот „Тврдина“ е обвинет за уништување на системите за прислушување.

Главен обвинет во „Таргет“ е неговиот поранешен шеф, Сашо Мијалков, но тој нема да оди во притвор. Мијалков, како надреден на Грујевски ќе се гони за злосторничко здружување со цел нелегално прислушување, но тој ќе остане да се брани од слобода. Судот на Мијалков му го одзеде пасошот и тој има обврска таму да се појавува еднаш неделно.

Грујевски лани во март беше упасен и однесен во притвор во затворот во Шутка, но по само неколку дена Кривичниот совет во Основниот суд Скопје 1 го преиначи решението на судијата на претходна постапка и мерката притвор ја замени со куќен притвор.

Дали конечно Горан Грујевски ќе биде сместен зад решетки, мерка што му е одредена од Судот, или неговото апсење во Солун ќе се развлече како шпанска серија, одговорот го има Министерството за правда, кое треба да бара екстрадиција за него и неговиот колега Бошковски.

Ј.М.