„Биди перспективен, започни свој бизнис“- нов проект за самовработување

Добивај вести на Viber

Ќе се организира натпревар за започнување на бизнис насловен „Биди перспективен, започни свој бизнис“,  за кој беше објавен јавен повик  согласно Програмата за конкурентност, иновации и претприемништво за 2013 година.

Проектот треба заеднички да го реализираат Министерството за образование и наука, Агенцијата за поддршка на претприемништвото, Бизнис старт ап центарот и стопанските комори, кои со низа активности ќе им овозможат на студентите и на младите претприемачи да се здобијат со знаења за тоа што значи да се биде претприемач и да се започне сопствен бизнис.

„Целта е со овој проект да создадеме  силна врска меѓу бизнисот и образованието, која е неопходна за успешно отпочнување на нови бизниси и за зголемување на бројот на нови и иновативни претпријатија, за да го намалиме притисокот за вработување, присутен во актуелниот бизнис амбиент, рече министерот за економија Ваљон Сарачини на денешната промоција на проектот. Според него, загрижува состојбата на раст на бројот на млади невработени лица, па ваквите проблеми ќе се надминат доколку бизнисот и образовниот систем работат заеднички. „Неделава го објавивме јавниот повик до сите студенти и млади претприемачи, за да аплицираат со идеи кои ќе бидат евалуирани од страна на посебна комисија, при што оние студенти на кои идеите ќе бидат избрани, ќе поминат низ обука составена од 13 модули, со цел да бидат адекватно оспособени за преточување на нивните идеи во бизнис план, а после обуката, студентите ќе бидат повикани да конкурираат со нивните бизнис планови, кои ќе бидат предмет на евалуација од страна на комисијата за евалуација“, појасни Сарачини. Притоа ќе бидат избрани трите најдобри бизнис планови, а победниците ќе добијат парични награди со кои ќе се обезбеди техничка и финансиска помош за основање на компанија. Пријавувањето е во тек.