БИЗНИС СО СУВЕНИРИ: Прилепско семејство тврди дека од оваа работа може да се живее
Објавено во: Економија 09 Март, 2017
Од оваа работа има профит, но за жал кај нас, во специјализираните продавници за рачни изработки се помалку се цени рачната изработка и се трудат да го донесат кинескот кич кој е поевтин и не е оригинален, раскажува 40 годишната Драгица Велкоска од Прилеп.
Таа веќе 4 години се занимава со изработка на сувенири, кои ги продава во специјализирани продавници во домашните туристички центри, но и во други делови на земјата. Сувенирите ги прави сама, а при продажба и помага сопругот. Во оваа работа многу ѝ помогнал нејзиниот талент, занимавањето со уметност цели 13 години и сликањето во повеќе техники.
„Пред 4 години бев понесена од убавите македонски етно шари и богатата традиција и посакав тоа да го преточам на една слика. До идеја за еден ваков бизнис дојдов покрај мојот сопруг и еден негов пријател кој ни предложи за потребите на неговата сувенирница во Охрид да изработам вински шишиња со разни етно везови и слики. Во нашата семејна куќа имаме деловен простор кој воедно е и изложбен салон каде ги изложувам сите мои креации, а ги има во голем број. Во врска со изработката работам сама, а во делот на продажбата имам помош од мојот сопруг“ – вели Велкоска.
Околу изработката, раскажува дека за различни сувенири е потребно различно време и труд за да се направат, зависно од материјалот.
„На пример за глинените производи е потребно повеќе време бидејќи има кај нив повеќе процеси додека да се дојде до крајниот производ. Тие процеси се боење, сушење, цртање, па повторно сушење и на крај лакирање, односно временски период од 3-4 часа, додека кај цртањето на порцелан и на стаклени шишиња времето е пократко и изнесува 2-3 часа. Секако, зависи и што треба да се нацрта, полесно е изработка на етно везови отколку цртање на слика. Најчесто користам готови глинени производи, порцелан, дрвени лажици, даски и стаклени шишиња полни со вино“ – додава Велкоска.
Таа вели дека оваа работа иако носи профит, сепак е сезонска и мора да се работи нешто друго во остатокот од годината.
„Сакам да напоменам дека оваа роба најчесто ја бараат и ја купуваат странски туристи, кои многу повеќе го ценат и почитуваат оригиналот од кинескиот кичерај. Со добра организација на работата и трошоците може да се заработи од оваа работа, но проблем е што оваа работа е сезонска и трае само неколку месеци“ – рече Велкоска.
Велкоска вели дека освен сувенири, прави украсни чинии, чаши, слики изработени со камчиња, но сепак таа е задоволна и си обезбедува егзистенција од својата работа.
Сања Атанасовска