Бошкоски најави кривична против судијката Радица Василевска за „Кампања“
Објавено во: Македонија 22 Ноември, 2017
Претседателот на Обединети за Македонија, Љубе Бошкоски во интервју за Макфакс изјави дека ќе поднесе кривична пријава против судијката Радица Василевска за активно учество во политички монтираниот случај „Кампања“.
Бошкоски додава дека тој и неговиот адвокатски тим имаат несоборливи докази дека станува збор за полициско-политичка местенка и ќе водат паралелена постапка, на страна од Специјалното обвинителство кое отвори случај под името „Тортура“.
„Судството мора да се ослободи од корумпираните судии. Додека не ги видиме на обвинителна клупа, иако Уставот ги штити судиите да не одговораат за дадено мислење, другиот дел од приказната е мрачниот дел, дека постојат договори за што имаме и докази. Мене кога ме апсеа полициските службеници ми кажаа дека ќе лежам осум години и ни ден помалку не ме осуди судијката Радица Василевска. Случајот „Ровер“ е уште помонструозен, кој се уште трае а за што имаме и докази, како обвинителството заедно со Грујовски кој сега е во екстрадиционен притвор дојдоа во Идризово да ми се закануваат“- додава Бошкоски.
Екс министерот за внатрешни работи, зборува и за системот за прислушување, кој уверува дека не бил злоупотребуван од државата во времето кога тој бил на челната позиција на министерството.