Добивај вести на Viber
БМВ ќе инвестира околу 300 милиони евра во нова фабрика во Бразил, пренесува Ројтерс, повикувајќи се на анонимен извор од компанијата. Според нив, изградбата ќе чини 800 милиони реали, а во фабриката треба да се градат пет модели, вклучувајќи и еден модел од марката Мини.
Бразил се смета како ветувачки пазар за автомобилската индустрија, но и таму се очекува забавување на растот, а пазарот за автомобили од високата класа сеуште останува мал. Засега од БМВ не сакаат да коментираат за оваа одлука посочувајќи дека со повеќе информации за плановите за изградба на новата фабрика ќе излезат во текот на оваа недела.
Главниот финансиски директор на компанијата, Фридрих Ајхинер неодамна во интервју за Ројтерс изјави дека компанијата има планови за нова фабрика во Бразил, но не даде информации за инвестицијата или за местото. За деталите се уште се преговара со политичарите во Бразил, бидејќи станува збор за грантови и се бара намалување на данокот за увоз.
Бразилското влада неодамна ги претстави новите законски олеснувања за странските компании кои имаат и домашно производство. За време на разговорите со бразилската влада, баварците јасно ставиле на знаење дека тие ќе инвестираат во фабриката само ако можат да заработуваат добри пари.