Царовска: Состојбата е алармантна, недостигаат градинки
Објавено во: Македонија 23 Октомври, 2016
Недостигаат градинки и родителите имаат сериозен проблем да ги запишат своите деца во градинка, изјави денеска на прес-конференција Мила Царовска, претседателка на Комисијата за труд и социјална политика на СДСМ.
Во постоечките, капацитетите се преполни и скандалозно запишувањето во градинките оди само преку роднински или партиски врски, додава таа. Вели дека состојбата е алармантна затоа што во групите има деца повеќе од дозволеното.
„Во групите се вклучени над 40 деца, иако согласно закон е од 8 до 25 деца, зависно од возраста. Оваа состојба ни укажува на алармантност. Зголемениот број на деца во занималната се ризик по здравјето и безбедноста како за децата, така и на вработените во градинките. Некои податоци покажуваат дека само 4 проценти од вкупниот број на децата 0 до 3 години се вклучени во градинка. Што се случува со останатите дечиња, како се снаоѓаат родителите на овие деца“ – рече Царовска.
Таа вели дека со оглед на економската состојба во земјава, ретко кој може да си плати да се грижат за неговото дете дома или опција се бабите и дедовците.
Царовска рече дека друга опција е родителите да ја остават работата и сами да се грижат за своите деца.За власта кажа дека не го исполнила ветеното, а згора на тоа ветува и изградба на нови градинки за кои нема пари во буџетот.