„ЧЕЗ“се жали: Нема основа за одземање на лиценцата и во Бугарија

Добивај вести на Viber

Поради заканата од Бугарија дека ќе и се одземе лиценцата за работа, чешката енергетска компанија „ЧЕЗ“  поднесе жалба до Европската комисија .Од  „ЧЕЗ“ посочуваат и дека дел од мерките кои бугарските власти ги преземале во врска за одземање на дозволата се во спротивност како со бугарските, така и со европските правни норми.

Постапката на бугарските власти, според чешкиот дистрибутер на електрична енергија го ограничува слободното движење на капиталот и слободата на делување кои се содржани во основните договори на Европската унија, се вели во соопштението кое го испрати портпаролката на „ЧЕЗ“ Барбора Пулпанова.

„Бевме принудени на овој чекор, бидејќи постојано сме подложени на негативни мешања од страна на бугарските институции. Побаравме од ЕК независна проценка на ситуацијата со цел да и се обезбеди објективна и праведна постапка на нашата бугарска фирма“, изјави Томаш Плескач директор на Одделот на „ЧЕЗ“ за дистрибуција во странство .

Компанијата се жали на начинот на кој започна постапката за одземање на лиценцата, откако Бугарите излегоа на масовни протести поради високата цена на струјата.

„Ние сме апсолутно убедени дека ги почитувавме и се уште ги почитуваме сите бугарски и европски закони. Обезбедуваме целосна соработка со обвинителот или даночните власти како и со антимонополното и енергетското регулаторно тело и очекуваме дека сите овие институции ќе одлучуваат самостојно и во согласност со законот“, оцени Плескач.

„ЧЕЗ“ заедно со чешката фирма „Енерго-пром“ и австриската ЕВН се соочуваат со критики од голем дел од бугарските граѓани кои ги обвинуваат за покачување на цената на електричната енергија. Сп цел да се смират протестите, бугарското обвинителство започна контрола во сите три енергетски компании.