Дачиќ бара конференција за Косово за да нема војни во иднина
Објавено во: Балкан 05 Ноември, 2017
Српскиот министер за надворешни работи, Ивица Дачиќ изјави дека е потребно да се организира нова меѓународна конференција за да се најде решение за Косово, што би спречило евентуална војна во иднина.
Дачиќ вели дека на оваа конференција би требало да учествуваат ЕУ, САД и Русија, затоа што целиот свет треба да се праша за решение за Косово.
„Србија, која Косово и Метохија исторски го смета за нејзин нераскинлив дел, треба да побара меѓународна конференција за наоѓање решение, кое ќе спречи можни војни за многу векови“ - изјавил Дачиќ, пишува Лајми.нет.
Овој предлог го отфрли вицепремиерот на косовската Влада и поранешен министер за надворешни работи, Енвер Хоџај, нарекувајќи го „непотребно нешто“.
„Дијалогот со посредство на ЕУ треба да заврши со договор за целосна нормализација на односите и реципрочно признавање. Србија историски никогаш не била за мировни договори и никогаш не ги признавала договорите со меѓународни преговори“ - напиша Хоџај на Твитер.
Предлогот на Дачиќ го отфрлаат претставници на косовските политички парти, а за Движењето „Самоопределување“ нема потреба да се коментира таквиот предлог бидејќи Дачиќ бара „меѓународна конференција за Косово и Метохија, кое не постои“.