Дали албанската дијаспора планира заземање на српски амбасади?

Добивај вести на Viber

Шефот на српската дипломатија, Ивица Дачиќ, денеска изјави дека има информации дека во албанската дијаспора се планира заземање на некое дипломатско-конзуларно претставништво на Србија во САД или Европа. 

Според него, ова би било за Србија да биде принудена да се откаже од барањето за судење на поранешниот косовски премиер, Рамуш Харадинај.

Дачиќ вели дека тоа покажува дека албанските политичари се подготвени „дури и на тероризам“ и ги предупреди сите земји дека се одговорни за безбедноста на српските дипломатски претставништва, а албанските политичари „да не си играат со оган“.

„Србија нема да се откаже од гонење на Харадинај ниту од кој било друг кој направи злосторства против српскиот народ. И српскиот народ, како и секој друг, заслужува правда – рече Дачиќ.

Тој истакна дека изјавата на министерот за надворешни работи на Албанија, Дитмир Бушати, дека по апсењето на Харадинај треба да се ревидира дијалогот Белград – Приштина, покажува дека во суштина албанската политика дозволува злосторства против Србите и дека дијалогот се води само за понатамошно афирмирање на косовската независност.

Тој вели дека навредите на сметка на српскиот премиер, Александар Вучиќ поради ставот за Харадинај,  Албанија покажува дека не ѝ е гајле за добрите односи со Србија. Ако Вучиќ, како што вели Бушати, живее во минатото, во каков ли темен вилает живеат албанските политичари во Албанија и на Косово, праша Дачиќ. 

Група „Анонимус“ од Албанија деновиве  ѝ се закани на француската влада дека ќе ја плати цената и ќе биде виновникот за почеток на нова војна на Балканот, доколку не го ослободи Рамуш Харадинај. 

Инаку тој е уапсен в Франција, а Србија бара екстрадиција затоа што тој треба да одговара за воени злосторства извршени над цивили.