ДЕЦЕНИСКИ БУМ: Грција се надева на рекорден број туристи сезонава
Објавено во: Балкан 09 Мај, 2017
Одливот на туристи од Турција достигна историски димензии, но соседна Грција се радува на интересот на рекорден број на посетители, каков што не е регистриран со децении, коментира германското издание Focus.
По 2016 година, кога Грција беше посетена од 27,5 милиони туристи, летната сезона оваа година се очекува да биде уште поуспешна - Министерството за туризам во Атина прогнозира дека земјата ќе биде посетенa од 30 милиони туристи.
Грција доби дивиденди од несигурната ситуација во популарни земји меѓу туристите како Турција и Египет, но не без значење е и фактот дека во последните две години ситуацијата во земјата, која беше погодена од тешка финансиска криза, постепено се нормализира. „Од 2015 година ние немаме значаен штрајк, немаме и напади - тоа ги тера луѓето да се чувствуваат безбедно“, објаснува Димитрис Скадилис, сопственик на хотел. Многу од летовите до земјата веќе се резервирани, а хотелите - полни.
Загрозената од стечај Грција може да ги искористи добро парите на туристите. Во 2016 година туристичкиот сектор генерира речиси 13 милијарди евра. Во оваа година износот може да е два пати поголем, велат во Атина.
Се очекува, исто така и заживување на побарувачката на работна сила. Дури и да станува збор за сезонски вработувања, таа сепак ќе може да донесе барем привремено олеснување на земјата со највисок процент на невработеност во Европската унија.