ДЕНЕС ВО ТРСТ: Голем состанок за интеграцијата на Западен Балкан во ЕУ

Добивај вести на Viber

Премиерот Зоран Заев ќе ја предводи владината делегација на Скопје на четвртата средба на врвот „ЕУ - Западен Балкан“ во рамките на Берлинскиот процес денеска во италијанскиот град Трст. Таму ќе биде и бугарскиот премиер Бојко Борисов.

Средбата има за цел да го стимулира процесот на евроинтеграција на земјите од Западен Балкан и да доведе до конкретни чекори во однос на инфраструктурата и нивно економска поврзување. За таа цел е осигуран фонд од 1,3 милијарди евра за Западен Балкан. Средствата треба да се користат до крајот на 2020 година за проекти во областа на транспортот, инфраструктурата, енергетиката, животната средина и иновации. Тие треба да бидат реализирани во рамките на Транспортната заедница на Западен Балкан, која ќе биде основана со потписите на премиерите на земјите од регионот на свечената церемонија.

На средбата ќе учествуваат премиерите на шесте земји од Западен Балкан, вицепремиери, министри за надворешни работи, за економија и за транспорт, високи државници на земјата домаќин, претседатели и премиери на одделни европски земји, како и претставници на ЕУ и на Европската комисија, високиот претставник на ЕУ за надворешна политика и безбедност Федерика Могерини, комесарот за проширување и добрососедска политика Јоханес Хан, како и комесарот за транспорт Виолета Болц. 

Во рамките на самитот премиерот Зоран Заев, заедно со средбите со највисоките европски државници и претставници на ЕУ и ЕК, ќе одржи и билатерални средби со премиерот на Албанија, Еди Рама, на Србија Ана Брнабиќ и на Словенија Миро Церар. Премиерот на Македонија ќе има средба и со Борис Џонсон, министер за надворешни работи на Велика Британија, кој ќе пристигне на оваа средба, како претставник на премиерот Тереза ​​Меј.