Денеска внатрепартиски консултации, а од утре продолжуваат преговорите за Влада
Објавено во: Македонија 21 Мај, 2017
Преговорите околу составот на новата Влада продолжуваат утре.
Лидерот на СДСМ и мандатар, Зоран Заев утре ги почнува средбите со Алијансата за Албанците.
Пратеникот Зијадин Села од Алијансата за Албанците за утре најави прес-конференција во Тетово и ќе се обрати на јавноста првпат по упадот во Собранието на 27 април кога беше претепан.
Од СДСМ велат дека денеска вршат консултации во рамки на партијата, а меѓупартиски средби засега немаат закажано. Од БЕСА објаснуваат дека нивните работни групи денеска работат на усогласување на ставовите после вчерашните преговори со СДСМ.
Претходните два дена во седиштето на СДСМ се водеа преговори со ДУИ и со БЕСА.
Претставниците на сите партии изјавија дека не преговарале за конкретни барања, туку за принципите околу формирањето на Владата.
Заев има рок од 20 дена за состав на Владата, но по добивање на мандатот најави дека тоа ќе се случи порано.