Десковска: Секој потрошен денар од Буџетот ќе биде на увид кај граѓаните
Објавено во: Македонија 28 Октомври, 2016
Секој потрошен денар од Буџетот на Република Македонија ќе биде на увид кај граѓаните и сите ќе имаат можност да видат како се трошат нивните пари, изјави денеска на прес-конференција Рената Тренеска Десковска, член на ИО на СДСМ.
Вели ова ќе претставува важен чекор во спречување на злоупотребите на властa.
„Македонија мора да има институции кои ќе бидат отчетни кон јавноста. Ќе воведеме мерки преку кои секој граѓанин од својот компјутер ќе може да провери колкава е платата на секој јавен функионер и дали и колкави надоместоци зема за патни или други трошоци и слично“ - изјави таа.
Секој министер ќе знае дека негов контролор е секој граѓанин на Македонија, додава Десковска.
„Ќе ја зајакнеме и контролата на Владата од страна на Собранието. Досега министрите бегаа од соочување во Собранието, ескивираа од пратеничките прашања кои имавме право да ги поставуваме само еднаш месечно. Заради зголемена транспарентност на Владата пред Собранието, наместо еднаш во месецот, пратеничките прашања ќе се одржуваат еднаш неделно, а наместо наместени и популистички телевизиски седници на Владата, јавноста ќе има целосен увид во сите владини документи и заклучоци како што се материјали за седници, дневен ред, записници, и одлуки“ - објасни Десковска.
Вели дека со ваквите мерки имаат план да создадат праведно и сигурно општество.
Смета дека ова е добар начин да се врати довербата во институциите.