Акционери на Машинопромет заработија кривични пријави за деловни измами

Добивај вести на Viber

СВР Скопје-Единица за економски и компјутерски криминал поднесе кривична пријава против П.П. (49) и Г.П. (47) поради постоење основи на сомнение за сторено кривично дело „фалсификување или уништување деловни книги“. Во периодот од 2014 до 2017 година П.П., како член на управен одбор, заедно со Г.П., во својство на акционери во Машинопромет АД Скопје, изготвувале невистинити менаџерски договори на високи парични износи. 

Севкупната архивска документација на правното лице Машинопромет АД Скопје од траен и времен карактер, печати и штембили и друга деловна документација, иако биле должни по завршување на нивните својства во органите на управување на Машинопромет АД Скопје, да ги предадат на новите органи на управување, истите ги изнеле од просториите на Машинопромет АД Скопје и ги одложиле на две локации во Скопје. 

После тоа продолжиле да изготвуваат исправи со невистинита содржина кои ги архивирале во деловодните книги. Вака фалсификуваните деловни документи ги пуштале во правен промет со цел да остварат противправна имотна корист за себе. 

Исто така, во февруари 2016 година, со невистинита документација изготвена на истиот начин, пријавените пред Основен суд Скопје II, поднеле предлог за поведување стечајна постапка над Машинопромет АД Скопје, невистинито прикажувајки дека наведеното правно лице е должник на правно лице Дион-Ра ДООЕЛ Скопје, кое е во нивна сопственост, со побарување на износ од 32.944.361 денари.