ДНЕВНО ЌЕ ИМААТ ПО 8000 ГОСТИ: Балкански град го ограничува бројот на туристи

Добивај вести на Viber

Хрватскиот град Дубровник ќе го намали бројот на туристи што ќе можат да влезат во стариот дел од градот, открил градоначалникот Мато Франковиќ, за британски Телеграф.

„Не сум тука за да ги развеселувам луѓето, туку да го направам квалитетот на живот во градот што подобар. Некои сопственици на крузери нема да се согласат со мене, но мојата главна цел е престојот на туристите во Дубровник да го направам што поквалитетен. Тоа, меѓутоа, нема да се случи доколку состојбата продолжи да биде таква каква што е сега“- вели Франковиќ.

Новото ограничување следува по препораките на УНЕСКО, и наместо 12.000 посетители, отсега стариот дел ќе може да го посетат само 8.000 посетители дневно.

Ограничувањето ќе трае две години и се однесува и на бројот на туристи кои доаѓаат во градот со крузери.

Градоначалникот  рекол дека во следните години ќе изгубат милиони, но убеден е дека во иднина ќе заработат уште повеќе.

„Заслужуваме да бидеме топ туристичка дестинација“- вели градоначалникот.

Тој не сака Дубровник да ја доживее судбината на Венеција и на Барселона, каде масовниот туризам има такви размери што веќе ги доведува инфраструктурата и културното наследство во опасност, а граѓаните протестираат против туристите. 

Во 2014 година во Дубровник пристигнале 463 крузери, во 2015 година  475, а во 2016 година  529 крузери со кои дошле 799.916 туристи.