Добрите економски вести од САД ја зголемија цената на нафтата
Објавено во: Економија 20 Јули, 2013
Поради добрите деловни и економски вести од Соединетите Американски Држави, цените на сировата нафта утрово пораснале, иако профитите го ограничиле растот на цените, наведуваат аналитичарите.
Американската лесна нафта за терминска испорака во август порасна за еден цент на 108,05 долари за барел, откако вчера поскапе за 1,56 долари на највисоко ниво од март минатата година.
Еден барел северноморска нафта од типот „брент“ на берзата во Лондон поскапе за седум центи на 108,77 долари.
Порастот на цените на нафтата во Њујорк го следеше сличен развој на настаните во Волстрит, по податоците кои покажаа дека бројот на луѓе кои се пријавиле за бенефиции за невработени е неочекувано намален, а регионалната преработувачка активност неочекувано пораснала.
Сите големи светски извозници на нафта не мора да се грижат бидејќи цените на берзите на примарните енергетски ресурси ќе продолжат да бидат високи, оценуваат руски експерти.
Глобалната побарувачка на нафта ќе се зголеми умерено во иднина, но во текот на следните неколку години значително ќе се промени сегашното ниво на цените на нафтата од околу сто долари за барел, велат руските експерти.
Таквото ниво на цените на нафтата ќе овозможи главните производители и извозници на суровини и во наредниот период да одржуваат рамнотежа помеѓу буџетските приходи и расходи и во исто време да обезбедат развој на нови технологии во производството. Тоа ќе влијае и врз ценовната ефективност на алтернативни извори на енергија.