Екипиран вториот владин ешалон-избрани замениците министри без поддршка на ВМРО ДПМНЕ
Објавено во: Македонија 23 Јуни, 2017
Во текот на вчерашната собраниска седница со 62 гласа „за“ се избраа и замениците министри во владиниот кабинет.
И покрај бојктот на опозицијата и бурните спротвставување на ВМРО ДПМНЕ замениците министри се заколнаа дека ќе работат согласно Уставот и законите во државата.
Најмногу несогласувања опозиционерите имаа околу името на Арта Точи и Јани Макрадули.
Во согласност со предлогот, за заменик министер за одбрана е избран Беким Максути, за внатрешни работи Агим Нухиу, во Министерството за правда оди Оливер Ристовски, во Министерството за надворешни работи Арта Точи, во Министерството за финансии Ширете Елези, а во Министерството за економија Кире Наумов. Власте Димковиќ е заменик министер за земјоделство, шумарство и водостопанство, Гоце Чакаровски за здравство, Висар Гани за образование и наука, Елми Азири за труд и социјална политика, Дејан Павлески за локална самоуправа, Владимир Лазовски за култура, Александар Бајдевски за информатичко општество и администрација, Ремзи Мехмеди за транспорт и врски, а Јани Макрадули заменик министер во ресорот животна средина и просторно планирање.
„Констатирам дека Собранието со мнозинство гласови ги избра лица за заменици-министри во Владата. Со оваа одлука на претходните заменици им престанува функцијата, рече собранискиот спикер Талат Џафери по завршувањето на гласањето.
На седницата не изостанаа ниту препукувањата кој е поголем патриот а кој е предавник, кој е криминалец, кој работи за граѓаните, кој за личните интереси.