ЕЛЕМ ТУРС: Паушално се критикува скијачкиот центар Попова Шапка
Објавено во: Мои пари 28 Јануари, 2017
Откако денеска група активисти покренаа иницијатива „Да ја спасиме Попoва Шапка“ ЕЛЕМ ТУРС ДООЕЛ Скопје се јави со реакција.
Имено, оттаму обвинуваат дека паушално се критикува скијачкиот центар Попова Шапка.
„Без намера да навлегуваме во мотивите на обвинувања на неколку поединци информираме дека скијачката сезона на Попова Шапка се одвива во согласност со организациските политики на ЕЛЕМ ТУРС и без поголеми проблеми. Цела постојна инфраструктура е во функција, а скијачките патеки се одлично подготвени.
Денес сабота, 28.01.2017 на Попова Шапка со исклучок на „Аеродром“ цела скијачка инфраструктура односно жичарите и скилифтовите работат и функционираат беспрекорно. Само денеска се продадени и искористени 1.100 билети што како податок зборува дека туристичката сезона во овој скијачки центар е во полн ек. Нивото на сигурност и безбедност како стандард во работењето на скијачката инфраструктура е исполнето контролирано и сертифицирано од за тоа овластени тела. Се до реализација на инвестициите кои ги водиме, скијачкиот центар мора да работи со постојната опрема и капацитет и наша краткорочна цел е тоа да биде одржливо за пристојно скијање и релаксација оваа сезона“, истакнуваат од ЕЛЕМ ТУРС ДООЕЛ Скопје .
Оттаму потенцираат и дека е точно дека скијачката инфраструктура е застарена, како што е вистина дека ЕЛЕМ ТУРС има план за развој на Попова Шапка.
Убедуваат дека планот е веќе почнат и со реализација на терен со изградбата на шестоседата жичара која е во тек. „И проектите како што се проширување на паркинзи, реновирање на хотелите, систем за заснежување се целосно подготвени и нивнат реализација се одвива во динамика која што не е целосно зависна од инвеститорот, туку од сплет на услови кои по својата природа се институционални, регулаторни, имотно правни и геолошки и не зависат од волјата и политиките на ЕЛЕМ ТУРС.
Сепак со верба дека иницијаторите имаат чесни намери и иницијативата е произлезена од нивната грижа за подобро работење и услови за функционирање на Попова Шапка, ги повикуваме на непосреден состанок во дирекцијата на друштвото каде ќе ни претставува задоволство да размениме наши позитивни и негативни искуства, што можеби ќе резултира со воспоставување соработка и помош во промоција на Попова Шапка како зимска дестинација и кои со идеи можат да придонесат во решавање на тековните проблеми во интерес на сите посетители на најголемиот скијачки центар во Република Македонија“, стои во нивната реакција во која на крај велат дека стојат на располагање за сите потребни информации.