Ердоган лут на медиумите - ги претставиле терористите како херои
Објавено во: Балкан 26 Февруари, 2017
Турскиот претседател, Реџеп Таип Ердоган вели дека обидот на меѓународните медиуми да ги претстават „терористите како херои“ и да ги игнорираат нивните жртви е дел од злобниот план против турскиот народ и турската влада.
„Двојните стандарди кои ги применуваат меѓународните медиумски организации при покривањето на настани кои сме ги претрпеле во последните години се познати“- кажа Ердоган вчера на отворањето на Меѓународниот саем на книгата во Истанбул.
Смета дека светот ја игнорирал славната победа на Турција, остварена при спречувањето за обидот за преврат на 15 јули. Тој истакна во таа смисла колку е важно тоа што се случило тогаш постојано да биде потсетник преку литературата и уметноста.
„Како и секогаш, не можеме да се потпреме на свеста или дејствата на другите“, додаде Ердоган.
Околу 250 луѓе беа убиени, а околу 2.200 беа повредени при обидот за пуч. За обидот за преврат, турските власти го обвинуваат исламскиот проповедник Фетхулах Ѓулен и неговото движење, наречено „ФЕТО“ во Турција.