Еве што пишуваат грчките медиуми за посетата на Чавушоглу на Македонија

Добивај вести на Viber

Грчките медиуми пишуваа за вчерашната посета на турскиот шеф на дипломатијата, Мевљут Чавушоглу на Скопје наведувајќи дека е прв министер за надворешни работи на некоја земја што ја посетил Македонија по изборот на новата Влада.

Најголем интерес  предизвика изјавата на Чавушоглу дека Турција го поддржува членството на Македонија во НАТО и дека земјата ја нарекувал со уставното име.

Медиумите кај јужниот сосед ја пренесуваат изјавата на македонскиот министер за надворешни работи,  Никола Димитров, за  времената спогодба и одлуката на Меѓународниот суд за грчкото вето за влез на Македонија во Алијансата.

„Ние имаме времена спогодба од 1995 година, како и пресуда на Меѓународниот суд во Хаг од 2011 година, па според тоа таа не би требало да има проблем за да добиеме покана за членство во НАТО под привремената референца БЈРМ. Јас ќе се обидам да ги убедам дека тоа е и во интерес на Грција и ќе се обидам кон правните аргументи да ги додадам и политичките. Сметам дека нашето членство во НАТО ќе има убаво влијание врз стабилноста на регионот“ - ја пренесуваат изјавата на Димитров.

Весникот „Катимерини“ објави коментар во кој пишува дека  јули ќе биде тежок месец за грчката дипломатија. Во него се спомнуваат и односите меѓу Македонија и Грција, констатирајќи дека е очигледно дека  е во интерес на Грција да се најде решение за името.