Фантомските невладини организации нема да ги добијат парите што им ги вети владата на ВМРО-ДПМНЕ

Добивај вести на Viber

Невладините организации со сомнително портфолио кои беа избрани од претходната влада да добијат пари од буџетот, нема да се израдуваат на илјадниците евра кои требаа да легнат на нивните сметки. Владата на вчерашната седница донесе одлука да ја запре постапката за распределба на парите за здруженијата и фондациите поради постоење на сериозни индиции за злоупотреба.

Огласот за распределба на 850.000 евра од државната каса беше распишан на 30 март, а непосредно пред заминување, владата на ВМРО-ДПМНЕ ги одбра невладините кои требаа да се офајдат.

Но, владата на Зоран Заев го задолжи Генералниот секретаријат да ги преземе сите потребни чекори за запирање на постапката и Државниот завод за ревизија да ја преиспита претходната одлука за доделувањето на овие средства, а доколку постои основ за злоупотреби, да се отвори истрага за обид за ненаменско трошење буџетски пари.

Меѓу невладините кои требаше да добијат пари беше, на пример, здружението „Јaсна иднина“ од село Небрегово, Долнени, кое требаше да искешира 49.000 евра за проект наречен „Невладините организации од руралните средини и новите технологии за видливост и промовирање“. На списокот со 39.000 евра беше и здружението за волунтаризам „Волонтерски центар“.

И двете овие здруженија беа претходно во јавноста неколку пати посочени за сомнителни распределби на парите од европските фондови, а во одредени случаи за поврзаност со одредени структури на ВМРО­ДПМНЕ.

Меѓу среќниците се најде и познатото во јавноста „Здружение за духовно обединување на Сетинци, Попадинци и Крушоради“ од Лерин, Егејска Македонија. На нивна сметка требаше да се уплатат 10.000 евра.

Ова здружение наводно донираше 7 споменици во составот на проектот „Скопје 2014“, а од владата на Груевски доби службен простор во центарот на Скопје и автомобил.

Грантови во висина од 30.000 до 50.000 евра беа одобренина 14 невладини организации. А, помали суми, од 500 до 10.000 евра требаше да добијат 28 организации.

Во овие таинствени организации УЈП и Финансовата полиција никогаш не извршиле контрола, но затоа овие институции со месеци го проверуваше работењето на невладини организации кои не беа по теркот на претходната власт.

Таканаречената десоросоизација ја најави поранешниот премиер Никола Груевски, веднаш по изборите на 11 декември, но институциите кои се вклучени во финансиските истраги негираа дека работат по директива на досегашната власт.

Ј.М.