Фармерите да поднесат барање за паушално оданочување во УЈП
Објавено во: Агробизнис 26 Декември, 2016
Од Управата за јавни приходи (УЈП) ги информираат земјоделците дека имаат можност данокот на доход да го плаќаат паушално доколку приходот од земјоделска дејност во 2016 година не надминува 1.300.000 денари.
„Без разлика дали земјоделието претставува ваша основна дејност или истата ја вршите како дополнително занимање, регистрацијата за паушално оданочување ви овозможува персоналниот данок да го плаќате еднаш во годината и да немате дополнителни трошоци за водење на деловни книги“ - појаснуваат од УЈП.
Тоа треба да се направи најдоцна до 31 јануари 2017 година на шалтерите на УЈП.
Ако веќе сте регистрирани во УЈП и доделен ви е даночен број (ЕДБ) како вршител на земјоделска дејност, поднесете само Барање за паушално оданочување на остварени приходи од земјоделска дејност (образец “ПДД-ПЗ“).