Фени Индустри: Сметката на Комбинатот e блокирана од деловна банка

Добивај вести на Viber

Oд Фени Индустри А.Д., Кавадарци, преку соопштение информираат дека компанијата се соочува со проблеми од 2015 година поради ниската цена на никелот на светско ниво која веќе неколку години е во континуиран пад. 

Велат дека ситуацијата дополнително е отежната со блокада на нивната сметка од страна на банка, и покрај претходните договори и вложување на големи напори во преговори за изнаоѓање најдобро и најоптимално решение за ситуацијата. 

„Поради блокадата на сметката сега имаме проблеми со дневните плаќања и кон други доверители, добавувачи, банки и компаниите кои не снабдуваат со руда, што доведе и до тоа некои од нив да покренат извршни постапки со кои единствено се оневозможува опремата да се продава, но истата е во функција, а со тоа и Комбинатот, односно производните линии се во функција. Напоменуваме дека досега платите на сите вработени се исплаќаа редовно и сметаме дека работењето на компанијата и егзистенцијата на вработените се уште не се доведени во прашање“ - стои во соопштението. 

Велат дека работат напорно и се надеваат дека брзо ќе се реши ситуацијата, односно дека банките и компаниите ќе им излезат во пресрет, за да можат да ја санираат состојбата и да го одржат Комбинатот во функција.