Фетаи побара вештачење на здравствената состојба на Поповски
Објавено во: Македонија 21 Ноември, 2017
Фатиме Фетаи од СЈО повторно не можеше да ги претстави аргументите од обвинението за случајот „Триста“ за набавката на возила од МВР за што постојат сомнежи за злоупотреби бидејќи обвинетиот Ѓоко Поповски, поранешен помошник министер за внатрешни работи не се појави во судница.
Неговите адвокати доставија медицинска документација и отворено боледување со кое бараат одлагање. Боледувањето било отворено на 16 месецов, но не е наведено до кој период му важи. Затоа специјалната јавна обвинителка, Фатиме Фетаи, повторно побара вештак да ја провери документацијата и наводите во боледувањето.
Поповски се товари дека го оштетил буџетот за над 450 илјади евра. Тој на отворањето на предметот во јули посочи дека само ја спровел одлуката на Комисијата за набавки во МВР и дека не сторил кривично дело. Барањето за негов притвор од страна на СЈО беше одбиено, а му беа изречени само поблаги мерки на претпазливост.