ФРАНЦУЗИТЕ БЕСНИ ПОРАДИ ИЗМЕНИТЕ НА ЗАКОНОТ ЗА РАБОТНИ ОДНОСИ: Бараат оставка од Макрон
Објавено во: Свет 23 Септември, 2017
Неколку илјади Французи денеска излегоа на протест на плоштадот Бастиља во Париз, за да го изразат своето незадоволство од реформите на францускиот претседател Емануел Макрон на законодавството за работните односи.
Тие се незадоволни од политиката на Макрон и бараат оставка.
Организатор на протестот беше радикалната левичарска партија Непокорна Франција на Жан-Лук Маланшон, заедно со неколку помали еколошки и левичарски партии и организации.
На протестот имаше и голем балон на кој беше испишано „Макрон, поднеси оставка“.
„Нема да им дозволиме да ги испразнат џебовите на сиромашните, за да ги нахранат богатите. Емануел Макрон почна да се „турка на рака“ со францускиот народ, но мислам дека можеме да ги спречиме декретите за рефоми на работните односи“ - изјави пратеник на партијата Непокорна Франција - Адријан Катенан.
Макрон вчера потпиша декрети за измени на пет закони од сферата на работните односи. Ова е негова прва поважна реформа откако стапи на претседателската функција во мај.
Со измените се ограничува правото на исплата на отпремнина на работниците при отпуштање од работа и на работдавците им се дава поголема слобода при вработување и утврдување на условите за работа.
Макрон тврди дека реформите се неопходни за јакнење на француската економија и за зголемување на бројот на работните места.
Претседателот рече дека првите мерки ќе бидат преземени следната недела.