ФЗОМ отвори истурен шалтер во Поликлиника Чаир

Добивај вести на Viber

Фондот за здравствено осигурување на Македонија денеска го пушти во употреба истурениот шалтер во Поликлиниката Чаир при ЈЗУ Здравствен дом Скопје.

Осигурените лица, здравствените установи, избраните лекари, како и обврзниците за плаќање здравствен придонес (фирмите) од овој шалтер ќе добиваат различни услуги, како пријави – одјави за здравствено осигурување, прием на ИЛ обрасци, печатење на сини картони, одјава/пријава од матичен лекар, потврди за платен придонес, потврди за ослободување од партиципација во цената на здравствените услуги за крводарители и лица со посебни потреби.

На пуштањето присуствуваа директорите на Фондот Јован Грповски и Џемали Мехази и на Здравствен дом Скопје Татјана Баевска-Вучковиќ.

Директорите сметаат дека отворањето на шалтерот ќе ги приближи услугите на граѓаните и ќе овозможи брзо, ефикасно и навремено добивање на услуги од Фондот, а со тоа ќе им овозможи на граѓаните заштеда на пари и време.

Истурениот шалтер на ФЗОМ во Чаир е трет од ваков вид, по Драчево и Ѓорче Петров. Треба да покрие голема територија и околу 65.000 граѓани и 70 приватни здравствени установи и аптеки.