(ГАЛЕРИЈА) Заев подготвен пред локалните избори, бара поддршка за ослободување од остатокот на режимот
Објавено во: Македонија, Галерија 09 Октомври, 2017
Македонија се менува, станува подобра и нема назад, изјави синоќа лидерот на владеачката СДСМ Зоран Заев, барајќи поддршка од граѓаните на локалните избори во недела, 15 октомври.
Заев во Скопје, на централниот предизборен собир на коалицијата „За живот во Македонија“ , истакна дека нема да ја изневери довербата на граѓаните.
„Денес барам поддршка, заедно да ја ослободиме Македонија од остатокот на режимот, да дојде добар живот во секое село, секој град...да изградиме слободни и развиени општини кои ќе ги поврзат граѓаните и ќе им ги вратат назад парите“, рече Заев.
Тој нагласи дека новата влада, на чие чело е тој, за четири месеци ја извлекоа Македонија од меѓународна изолација.
„Од Бугарија направивме пријател и сојузник за евроинтеграции. Ги стабилизиравме и унапредивме односите со Србија. Односите со Албаија и Косово не се на највисоко ниво и без отворени прашања. Имаме искрен дијалог со Грција. Македонија денес е пријател со соседите, земја која одлучно чекори кон НАТО и ЕУ“, порача Заев кој исто така изрази уверување дека Македонија ќе стане 30 земја членка на НАТО.
Како симбол на новото време, Заев најави дека, како што рече „тенкот“ на екс премиерот Никола Груевски, односно владиниот „мерцедес“ од 600 000 евра ќе биде продаден, а од тие пари ќе се купат амбулантни возила.
На 25 септември официјално почна кампањата за локалните избори кои се закажани за 15 октомври. Кампањата трае до 13 октомври, а изборниот молк почнува на 14 октомври.
Во прилог ви пренесуваме фотографии од синоќешниот митинг на владеачката партија во главниот град.
ФОТО: ФАКТОР