Германија бара од инженери до негуватели - Кој е на „позитивната листа“?

Добивај вести на Viber

Не поминуваат неколку дена а во медиумите во земјите од Западен Балкан да не објави некој текст за наводно големи можности за вработување во Германија. Постојат сведоштва на луѓе кои успеале, „форумаши“ кои и на други им препорачуваат да спакуваат сѐ во два куфери и да си одат, често со фантастични приказни дека се оди брзо и лесно, без бирократија и дека економски најсилната држава во Европа, само чека да се појавите и веднаш ќе ве вработат. Така, неодамна медиумите на албански јазик објавија дека во моментот има 46.000 работни места во Германија кои се резервирани само за лица од Косово и Албанија. Излезе дека дел од приказната е чиста научна фантастика.

- Изворот на овие бројки кои ги спомнавте се на веб-сајтот „Make it in Germany“, тоа е официјален повеќејазичен онлајн портал за странските работници кој го води Министерството за економија и за труд и Федералната агенција за вработување, вели Кеа Декер, директор во седиштето на германската Агенција за вработување која се занимава со мигранти заинтересирани за работа во Германија. Декер за Дојче Веле го побива митот дека работните места се „резервирани“ за граѓаните на една или друга земја: „Сите понудени места на веб-сајтот се нудат на агенцијата од компании како места кои треба да бидат пополнети со работна сила од странство. Понудата е тука за сите засегнати со квалификации и не е насочена исклучиво за албанските граѓани“.

Кој е на „позитивната листа“?

Страницата „Направете го тоа во Германија“ го има на повеќе јазици (http://www.make-it-in-germany) и овозможува сите заинтересирани страни со неколку кликања да стигнат до препораките (прашалникот се уште треба да се пополни на англиски или германски). Во зависност од тоа дали сакате да работите, учите или да завршите занает, од која земја доаѓате од и каде сте се здобиле со диплома, алгоритамот ви препорачува најдобри опции. Овде теоретски може да се пријават дури и Германци, но Кеа Декер објасни дека горенаведените 46.000 места се избрани во области каде што на Германија со години им фалат експерти. Кога е докажано дека земјата нема доволно експерти во одредена област, тогаш работодавците имаат правна основа да вработат луѓе од странство.

Меѓу високо образованите првенствено се бара работна сила во т.н. MINT професии (математика, информатика, природни науки и технологија). Германија над сѐ им требаат добро квалификувани работници. Но, некој да би работел во Германија, не мора да биде нужно високо образован, вели Декер. Таа потсети дека пред три години го олесниле пристигнувањето и на оние со средно образование и ако нивните интереси се наоѓа на т.н. „позитивна листа“, имаат соодветна диплома, која е призната во Германија и понуда за конкретна работа. На „позитивната листа“ со години се бараат негуватели на стари лица, водоводџии, железнички работници, ѕидари, заварувачи, електричари, програмери ... Од октомври минатата година таму е дури и можноста за вработување на определено време на неквалификувани работници.

Наместо да бараат азил

Пристапот до пазарот на труд во минатото е особено поттикнат и промовиран во земјите од Западен Балкан кои, до почетокот на бегалската криза, беа главните земји на потекло на баратели на азил. Сега Србија, Босна, Македонија, Косово, Албанија и Црна Гора се на листата на т.н. „безбедни земји на потекло“, а Берлин има за цел на нивните граѓани да им го приближи легалниот начин на доаѓање и престој во Германија. Оние кои сепак одлучиле да бараат азил имаат мали шанси: „нема пристап до германскиот пазар на труд, ако дозволата не е врз основа на признавање на статус на бегалец“. Помалку од еден процент од барателите на азил од земјите од Западен Балкан, всушност и добиваат азил во Германија, пишуваат од ДВ.