Германската влада негира спасувачка акција за Дојче Банк
Објавено во: Финансии 28 Септември, 2016
Германската влада ги негираше наводите на повеќе германски медиуми дека подготвува сценарио за спас на Дојче Банк со државни средства со кои би презела 25% од акциите.
Дојче Банк се наоѓа во сериозни проблеми откако вредноста на акциите двојно опадна годинава, а се соочуваат и со плаќање на огромна казна во САД од 14 милијарди долари за непроверени и ризични хипотеки кои датираат уште од економската криза во 2008-ма.
Написите се погрешни. Германската влада не подготвува план за спас, нема потреба да навлегуваме во вакви шпекулации, посочи германскиот министер за финансии Волфганг Шубле.
Ниту германскиот банкарски регулаторен одбор засега не предвидува спасување на Дојче Банк која продава имот и сопственички удели во повеќе компании со цел да собере доволно средства за да може да ја плати казната на Американското министерство за правда.