Ги тужи Microsoft за 600 милиони долари зашто му го расипале компјутерот

Добивај вести на Viber

Корисникот Френк Диркман од Албакерки, Ново Мексико ја покрена досега највисоката поединечна тужба против Microsoft од кого бара неверојатни 600 милиони долари оштета. Според тужителот неговиот компјутер наводно се расипал откако бил принуден да ја инсталира надградбата со новата верзија на оперативниот систем Windows 10.

Microsoft кај повеќето корисници наметна агресивни методи за извршување на надградбата со новиот софтвер која одреден временски период дури беше и бесплатна за активирање. Дел од корисниците добиваа и нападни известувања на нивните компјутери да ја прифатат надградбата без можност да ја тргнат пораката од екранот.

Диркман во тужбата тврди дека надградбата со Windows 10 била неуспешна, а стариот оперативен систем бил блокиран и тој повеќе не можел да го користи лаптопот на оптимално ниво.

Секако, Диркман е еден од судските тролови кој бара астрономски суми за оштета од голема компанија како Microsoft и извесно е дека нема да добие 600 милиони долари, но неговата тужба може да предизвика ефект врз други корисници со слични искуства при форсираната надградба кои би можеле да се приклучат во судската битка. Групните тужби во САД се вистинска ноќна мора бидејќи може да траат со години но, и да резултираат со високи колективни оштети.