ГРАЃАНСКА ИНИЦИЈАТИВА 5 ДО 12 ќе започне со поставување на шатори спроти Собранието
Објавено во: Македонија 18 Август, 2017
На 20ти август 2017, со почеток од 09:00 часот, ГРАЃАНСКА ИНИЦИЈАТИВА 5 ДО12 ќе започне со поставување на шатори, во Парк „Жена - Борец“, спроти Собранието на Р. Македонија.
Ова е 5ти (петти) камп на ГРАЃАНСКА ИНИЦИЈАТИВА 5 ДО12, односно 60 дена граѓански активизам во претходниот систем со претходната Влада и Собрание, и 60 дена граѓански активизам со сегашната Влада и сегашното Собрание.
Во изминатите 120 дена, беа остварени средби во Собранието и работни состаноци со ресорните Министерства, заедно со претставници на Народен правобранител и Хелсиншски комитет за човекови права.
Освен Министерството за труд и социјална политика кое покажа спремност и се заложи да покрене иницијатива во Собранието за измени на Законот за социјална заштита по брза постапка, од останатите ресорни министерства се уште нема конкретни решенија за барањата кои беа доставени.
Затоа, кампувањето со шатори продолжува и овој месец со следните барања:
- Вклучување на граѓанскиот сектор во креирањето на политиките кои се однесуваат на лицата со посебни потреби
- Вклучување на граѓанскиот сектор во наоѓање решенија за подобрување на условите за живот на лицата со посебни потреби
- Вклучување на граѓанскиот сектор во имплементација и супервизија на програмите и проектите кои се однесуваат на лицата со посебни потреби
- Вклучување на лицата со посебни потреби како приоритет во програмата на Владата, и во работата на Собранието
- Вклучување на лицата со посебни потреби како приоритет во Буџетот на Р. Македонија, и буџетите на општините на Р. Македонија
Согласно Уставот и Законите на Р. Македонија, ГРАЃАНСКА ИНИЦИЈАТИВА 5 ДО12 може да обезбеди легимитет во Собранието и ресорните Министерства, на следниот начин и под следните услови:
- Покренување на локална или национална граѓанска иницијатива во Собранието за измена на законски или подзаконски акти, поднесена од овластен предлагач и потпишана од минимум 100 потписници
- Потпишување на Меморандум за соработка со ресорните Министерства, за вклучување на граѓанскиот сектор во креирањето на политиките кои се однесуваат на лицата со посебни потреби
- Потпишување на Меморандум на соработка со надлежните институции кои се вклучени во процесот на имплементација и супервизија на политиките кои се однесуваат на лицата со посебни потреби
ГРАЃАНСКА ИНИЦИЈАТИВА 5 ДО12 ги повикува сите лица со попреченост, хендикеп или посебни потреби, заедно со нивните родители и семејства, да ја поддржат иницијативата и да учествуваат во процесот за изедначување на сопствените права.
Секој граѓанин може своеволно и доброволно да ја даде поддршката на ГРАЃАНСКА ИНИЦИЈАТИВА 5 ДО12 во покренување на локални и национални иницијативи во Собранието, со потпишување на ИЗЈАВА ЗА ПОДДРШКА.
ИЗЈАВА ЗА ПОДДРШКА е достапна на следниот линк:
http://5do12.org.mk/wp-content/uploads/2017/04/ИЗЈАВА_ЗА_ПОДДРШКА_МК.pdf
Здруженија на граѓани и неформални групи на граѓани и родители на лица со посебни потреби, со минумим 100 потписници, можат рамнопрaвно да учествуваат и одлучуваат во Собранието на ГРАЃАНСКА ИНИЦИЈАТИВА 5 ДО12, чии обврски и задачи се дефинирани во МЕМОРАНДУМ ЗА ВМРЕЖУВАЊЕ И СОРАБОТКА.
МЕМОРАНДУМ ЗА ВМРЕЖУВАЊЕ И СОРАБОТКА е достапен на следниот линк:
http://5do12.org.mk/wp-content/uploads/2017/04/МЕМОРАНДУМ_ЗА_СОРАБОТКА_МК.pdf
За времетраење на кампот, во временски периоди од 12:00 до 15:00 часот и од 18:00 до 20:00 часот, се предвидени состаноци и консултации во врска со Меморандум за вмрежување и соработка, помеѓу Здруженија на граѓани и неформални групи на граѓански активисти.