Грчките кредитори предупредуваат за „многу големи“ ризици за економските реформи

Добивај вести на Viber

Политичкиот отпор и можни судски дела се меѓу големите ризици за реформите кои се дел од програмата за економски спас на Грција, тврдат европските кредитори на Атина.

Долгоочекуваниот извештај на ЕК и ЕЦБ открива заклучоци на Тројката кредитори од ЕУ, ЕЦБ и ММФ по однос на напорите на Атина да ги постигне целите зацртани во договорот за финансиска помош во висина од 130 милијарди евра.

Формално извештајот потврдува дека Грција ја заслужува последната транша од договорот, но предупредува дека се уште постои ризик да не се исполнат барањата.

- Клучни ризици се во нецелосно политичко ангажирање бидејќи коалициската поддршка за владата е кревка, и некои делови од програмата имаат политички отпор, независно од решеноста на владата, се вели во документот.

- Важните буџетски мерки веројатно ќе бидат нападнати во суд што може да се одрази на пополнувањето на буџетската дупка...намалувањето на расходите во 2013 година може да влијае негативно врз слабата економија, се вели во извештајот.

Прогнозите се дека грчката економија ќе ослабе со шест отсто, за уште 4,2 отсто ќе се намали БДП пред да се регистрира раст од 0.6 отсто во 2014 година.