Нов штрајк во Грција-парализиран поморскиот и железничкиот сообраќај
Објавено во: Балкан 03 Април, 2013
Дваесет и четири часовен штрајк во знак на протест против економските мерки го парализираше денеска поморскиот и железничкиот сообраќај во Грција, што засегна десет илјади патници, јави ДПА.
Фериботите останаа вкотвени на пристаништата во земјата, а застој има и во железничкиот сообраќај поради штрајкот на вработените во секторот против намалувањето на платите.
Пристанишните работници бараат да ги добијат од бродосопствениците неисплатените плати и да се стави крај на работењето без договор и осигурување. Тие исто така бараат Владата да се откаже од планот за определување на минимален број на пристанишни работници со мотив, дека тоа ќе доведе до намалување на работните места.
Се очекува денеска да има и застој во воздушниот сообраќај, поради тоа што контролорите на летовите исто така стапуваат во 24-часовен штрајк.