Добивај вести на Viber
Грчкиот премиер Андонис Самарас синоќа се сретна со министерот за финансии Јанис Стурнарас во рамките на обидите на Владата да заокружи неколку нереализирани цели во врска со структурните реформи пред претставниците на „тројката“ да се вратат во Атина следната недела.
Стравувајќи од влошување на климата во еврозоната по тензичните преговори за помошта за Кипар, Самарас води дискусии со цел финализирање на позиција на Грција за отпуштања и трансфери во државниот сектор, за итниот данок на имот, како да се намали товарот на оние кои имаат кредити и каков план за исплата ќе им биде понудени на Грците кои должат даноци.
Се уште не е познато колку државни службеници ќе ги загубат своите работни места до крајот на 2014 година. Последниот предлог на Атина кон „тројката“ беше оваа и следната година да бидат отпуштени пет илјади вработени во јавниот сектор.
Самарас и Стурнарас очекуваат меѓународните кредитори во следните неколку дена да го одобрат доделувањето на следната транша од помошта за Грција во вредност од 2,8 милијарди евра.
Еден од тројца даночни обврзници и две од три компании во Грција и должат пари на државата, соопшти грчкото Министерство за финансии, нагласувајќи дека 2,5 милиони даночни обврзници должат вкупно 20,4 милијарди евра и речиси 150.000 компании должат околу 35,5 милијарди евра.