Груевски: Не седиме со скрстени раце, ВМРО ДПМНЕ е во фаза на внатрешно реструктуирање
Објавено во: Македонија 17 Јуни, 2017
На 27 от роденден на својата матична партија екс премиерот Никола Груевски објави дека ВМРО ДПМНЕ е пред кадровско освежување, односно се прави внатрешно реструктуирање.
„Ние не седиме со скрстени раце. ВМРО-ДПМНЕ е во фаза на внатрешно реструктуирање, и пред кадровско освежување. Партијата ги прави последните подготовки за новиот начин на дејствување во новосоздадената ситуација. Во тек се консултации и внатрепартиски дијалог за промени и корекција на се она што е наша слабост и грешки, креирање и на нови политики во различни области каде недостасуваа или беа застарени или запоставени. Во тек е внатрешна обнова и подготовка за нов почеток, ново утро, кон повторно враќање на власт на најмоќната, најголемата и најуспешната политичка сила во Македонија, ВМРО-ДПМНЕ и коалицијата „За подобра Македонија““, изјави Груевски.
Како и вообичаено на секој јавен настап Груевски како по навика поголем дел од обраќањето зборуваше и посвети на партијата која му ја зема власта.
Критики, критики и критики од екс премиерот за власта на СДСМ која само што почна да работи а екс премиерот бара Македонија да испорача реформи, брз влез во ЕУ и НАТО, просечна плата која СДСМ ја најави во текот на мандатот.
Груевски во дел од говорот се испофали за она што го направила неговата партија и колку странски инвестиции донела.
Сепак лидерот на ВМРО ДПМНЕ потенцираше дека партијата мора да се реструктуира.
„ВМРО-ДПМНЕ треба да ги дефинира целите на своето идно делување, да ги подобри односите со дел од меѓународната заедница во насока на заедничките цели и интереси, но и да формира автентична политика кон помалите етнички заедници, вклучувајќи ги и Албанците кон кои мора да ги презентираме нашите верувања за заедничко живеење во државата, и да ги разбиеме стереотипите кон негативната кампања против нас во албанските медиуми, која беше свесно диригирана и темпирана во изминатиов период“. рече тој.