Грујевски и Бошковски се жалеле на политички прогон, не сакаат екстрадиција

Добивај вести на Viber

Поранешниот началник во Петтата управа Горан Грујевски и Никола Бошковски, вработен во УБК денеска пред грчкиот јавен обвинител изјавиле дека не сакаат да бидат екстрадирани во Македонија, затоа што се плашеле за своите животи. 

Тие според пишувањата на грчките медиуми изјавиле дека се жртви на политички прогон. Тврделе дека се загрозени од високи функционери во Министерството за внатрешни работи.

Тие вчера беа уапсени на Солунскиот аеродром со лажни бугарски пасоши и притоа грчките власти откриле дека двајцата се барани со меѓународни потерници. Тие денеска првин беа однесени кај јавен обвинител во Солун, кој ги товари за поседување и користење фалсификувани патни исправи, а дополнително ќе бидат однесени и во Основен суд во Солун.

Двајцата се обвинети од СЈО за нелегално прислушување на илјадници граѓани преку злоупотреба на системите за следење во МВР и за физичко уништување на системите со кои се прислушувало, за да нема докази. Станува збор за предметите „Тврдина“ и „Таргет“, кои  се споени во еден предмет. Во бегство Грујевски и Бошковски беа од 26 јули, кога требаше да бидат однесени во притвор.