Харадинај неделава ќе се врати во Косово?

Добивај вести на Viber

Претседателот на Алијансата за иднина на Косово и поранешен командант на УЧК, Рамуш Харадинај изјави дека до крајот на неделата ќе се врати на Косово.

Тој утре повторно ќе се појави пред судот во градот Колмар во Франција.

„Ние потоа веднаш ќе побараме рочиште за разгледување на овој предмет, односно ќе ги отфрлиме обвиненијата и нивното барање за екстрадиција што е целосно политичко“- изјави Харадинај за балканскиот сервис на Радио слободна Европа.

Според него, станува збор за политичка игра на Србија воочи претседателските избори.

„Србија си игра со времето и доцнеше со поднесувањето на материјалите за да го оддолжи процесот. Но предметот е сега пред судот и верувам дека ќе се испочитуваат временските рокови за да заврши процесот. Станува збор за предмет од 2004 година, кој го фабрикувале остатоците на правосудието на Милошевиќ во Белград“/ кажа Харадинај.

Тој истакна дека истиот предмет постоел и во Хашкиот трибунал, но обвинителството го оценило како нерелевантен.

Харадинај вели дека никогаш нема да потклекне на Србија,  бидејќи е заинтересиран за мир и интеграција на Балканот во ЕУ и НАТО.

Тој е уапсен е во Франција по потерница од Србија.  Харадинај во јуни 2015 година беше уапсен во Словенија, исто така по потерница од Интерпол распишана од Србија. Србија го товари за убиства и тешки злосторства на Косово во текот на 1998 и 1999 година. Харадинај беше водач на ОВК и поранешен косовски премиер. Хашкиот суд го ослободи од обвиненијата за воени злосторства во 2012 година.