Добивај вести на Viber
Министерството за земјоделство на Хрватска од денеска ќе почне со откуп и уништување на околу 70 илјади литри млеко, а производителите на млеко, делумно ќе бидат обештетени.
Од денеска околу 400 фарми од источна Славонија секој ден ќе го транспортираат млекото кое ќе се уништува во простории со биогас, а производителите делумно ќе бидат обештетени. Точниот износ на оштетата која што треба да ја добијат, сеуште не е утвреден, пренесува хрватскиот портал 24 вести.
Претседателот на Сојузот на задруги на производители на млеко, Давор Блажиќ, како што пренесувааат хрватските медиуми, жали што Министерството за земјоделство претходно не донело мерки за да се спречат ваквите настани, но сепак го поздравува потегот.
„Луѓето се заглавени во кредити и подобро е министерството да се погрижи за млекото, откулку поединци да го фрлаат“ изјави Блажиќ
Се проценува дека штетата од непродаденото млеко изнесува околу 240.000 куни или околу 30.000 евра дневно.
Според пресметките, ако 300 фарми произведуваат просечно 300 литри млеко, а литар млеко е околу 3,43 куни (30 евроценти), тогаш загубата е околу 30.000 евра дневно, пренесува хрватски Медиа сервис.
Јешиќ: На моите деца им забранив да пијат млеко
Потпретседателот на Владата на Војводина и секретар за земјоделство, Горан Јешиќ за српските новинари изјави дека на своите деца им забранил да пијат млеко
“Млекото не е исправно. Резултатите од новите анализи покажуваат уште поголемо количество на афлатоксин во млекото, за дури седум пати над дозволеното. Овие нови резултати ќе ги објавиме за три до четри дена“ изјави Јешиќ. Мострите од млекото беа пратени во Германија.