Хрватската лотарија во загуба поради обложувачниците
Објавено во: Балкан 01 Февруари, 2013
Хрватската лотарија девет месеци од минатата година работела со загуба од 3,48 милиони куни (457 илјади евра).
Таа компанија своите минатогодишни загуби ги образложува со тоа дека е една од ретките лотарии во Европа која организира и други игри на среќа, освен лотариските, а тоа се обложување, казино и апарат-клубови, кои се игри со ризик.
Затоа постои ризик и за Хрватската лотарија дека на тие игри ќе загуби, пишува загребскиот весник „Вечерњи лист“.
- Факт е дека обложувањето има својства на ризична игра во која може да дојде до исклучително високи исплати на играчите, па дури и повисоки од извршената уплата. Токму тоа се случи во септември минатата година кога обложувањето оствари загуба по повеќе од две години, што дополнително влијаеше на негативните трендови и донесе негативни финансиски резултати, објаснуваат во Хрватската лотарија.
Лошите деловни резултати Лотаријата ги објаснува и со економската криза во земјата, која се одразила и на уплатите за игри на среќа.