Добивај вести на Viber
Хрватскта градежна компанија „Конструктор“ оди во стечај, а одговорноста за тоа оди на адреса на сопствениците и на менаџментот на компанијата, пренесуваат хрватските медиуми. Според изјавата на хрватскиот министер за финансии Славко Линиќ, за градежната компанија во моментов нема друг излез, освен стечај, а за тоа најголема вина има однесувањето на сопствениците и на менаџментот кои не разговараа со доверителите, туку сопственикот основа нова компанија, на која ги префрли работниците и имотот, а долговите ги остави на „Конструктор“.
Компанијата е со блокирани сметки, уште од ноември минатата година, а беа блокирани 17 сметки поради долг од приближно 10 милиони евра што го има на име данок. Уште тогаш, хрватскиот министер за финансии го обвини сопственикот на компанијата, Жељко Ждериќ, дека не се грижи за работниците, туку само за своите лични интереси.
Во август лани Министерството за сообраќај на Хрватска и „Конструктор инженеринг“ ги пребија меѓусебните долгови, а беше постигнат и договор со неколку банки за уплата на средства наменети за плати на работниците. На компанијата веднаш и' беше одблокирана сметката и работниците се вратија на градилиштата. Но, набрзо дојде до ново блокирање, па сега веќе се доведува во прашање повторното почнување на договорените работи.
Градежната фирма „Конструктор“ од Сплит, во Македонија беше ангажирана на изградба на дел од „Скопје 2014“.